बागचौरको २०८३/८४ बजेट पारित : विकासभन्दा प्रशासनिक खर्च २.६ गुना बढी

सल्यान  बागचौर नगरपालिकाको १६ औँ नगर सभाले आगामी आर्थिक वर्ष २०८३/८४ का लागि रु. ७७ करोड २३ लाख ७५ हजार ३३० बराबरको नीति, कार्यक्रम तथा बजेट सर्वसम्मत रूपमा पारित गरेको छ। पारित बजेटमा विकास निर्माणका लागि विनियोजन गरिएको पुँजीगत खर्चको तुलनामा चालू खर्च उल्लेखनीय रूपमा बढी रहेको देखिएको छ।
नगर सभाबाट पारित बजेटअनुसार चालू खर्चतर्फ रु. ५५ करोड ७८ लाख ११ हजार २७९ विनियोजन गरिएको छ भने पुँजीगत खर्चतर्फ रु. २१ करोड ४५ लाख ६४ हजार ५१ मात्र छुट्याइएको छ। यस आधारमा चालू खर्च पुँजीगत खर्चभन्दा झन्डै २.६ गुणा बढी रहेको देखिन्छ।
नगर सभामा नीति, कार्यक्रम, बजेट तथा आर्थिक विधेयकमाथि जनप्रतिनिधिहरूबीच विस्तृत छलफल भएपछि बजेट सर्वसम्मत रूपमा पारित गरिएको हो। चालू खर्चमा कर्मचारी तलब–भत्ता, कार्यालय सञ्चालन, प्रशासनिक व्यवस्थापन तथा अन्य नियमित दायित्वहरू समावेश हुनेछन् भने पुँजीगत खर्चबाट सडक, खानेपानी, शिक्षा, स्वास्थ्य, कृषि, पर्यटन तथा अन्य पूर्वाधार विकासका योजना कार्यान्वयन गरिने जनाइएको छ।
यद्यपि चालू खर्चको हिस्सा उच्च देखिए पनि नगरपालिकाले शिक्षा, स्वास्थ्य, कृषि, खानेपानी, सडक पूर्वाधार, पर्यटन प्रवर्द्धन, रोजगारी सिर्जना, सामाजिक सुरक्षा तथा सुशासनलाई आगामी आर्थिक वर्षका प्रमुख प्राथमिकताका रूपमा अघि बढाउने प्रतिबद्धता जनाएको छ।
स्थानीय तहको बजेटमा चालू र पुँजीगत खर्चबीचको सन्तुलनलाई विकासको प्रभावकारितासँग जोडेर हेरिने भएकाले आगामी आर्थिक वर्षमा विनियोजित बजेटको प्रभावकारी कार्यान्वयनतर्फ सबैको चासो रहने अपेक्षा गरिएको छ